Za prvi ričavac skupili smo se u konobu kod Branka i podilili u 3 grupe. Po friškoj buri,  obašli smo grad, Prosiku i Goliju.  Đirali smo od šest do devet uri vecer. (18-21)

Za drugi ričavac obašli smo ulice Bana Jelačića, put gorblja i Bašacu, a za treti ričavac odili smo u Sveti Grgur, Lokunju i  Vodice.

U svi tri ričavca obašli smo oko 120-130 kuć i skupili smo puno jaj,  kobasic, fažola, suhoga mesa, brašna, uja, cukara, galetic, voća i ništo vina i bibite.  Odlucili smo da ćemo sve ca skupimo u ričavciman skuvat i paričat i donit na pijacu da narod kuša. Kad je to cu, Zdenko Oštrić je kupi ijadu jaj, a Bepo Bile je doni svoga vina. Neka bude obilato! 

U nediju je bila povorka. Bilo je puno dice i dosti velih. U nošnje i maškaranih. (Moglo nas je bit i više…) Obavili smo primopredaju vlasti na pijacu, a naša glazba je po 85. put zasvirala paško kolo. Kola su bila lipa i baš kako triba, bez natezanja potezanja i dercanja. Kolat je moglo i mlado i staro.

U neka doba, donili smo fažol, onaj koga smo obećali da će se skuvat od onoga ca se skupi u ričavac. Pod vrnjacon našega majstora kuvanja, Bobića, fažol  je bi i više nego dobar. Podililo se je oko 250 pijatov, a potli fažola donili smo i desert – pandešpanj od naših koludric i frite tete Marije.

Pervidan

Jutro lipo, a popodne zlo. Daži.  Dica od vrtića i mići od škule skupili su se u Knežev dvor i tamo se zabavjali. Tete od vrtića sve od reda, bile su vridne, a meštrovice Sanja i Antonija lipo su zamislile program i trudile su se da sve projde u najbojemu redu. Hodilo je sve ka po špagu:  malo igre malo kola, pa opet igra i kolo. Dica su se okripila sa teplin čajen, krafnamin i pandešpanjiman tete Zlate i tete Mirjane i fritamin tete Marije. Naši vridni kuvari Bobo i Bražen u našemu šatoru paričivali su feštu od jaj. Cistila se je kapula, rizale su se kobasice i tukle jaja. Ki će boje tuč jaja? Šljivo, Frane Dušan ili Nedo? Bobo je vika: riži berzo, muti, mišaj! Daj! Daj! Fritaja, prva pa druga. Bila je ukusna, svi su je falili. Podililo se je 150-200 pijatov.

Kad se je fritaja pojla, fermalo je dažit. Glazba svira zadnje kolo, a kolarov nidi!! Kolo su povela dica, a potli su se još zabavili na koncertu Bojana Jambrošića. Tete su okolo 10 uri spratile dicu doma i ostale poredit Knežev dvor. (znamo ca to znači).

Utorak

Ima Boga – lipi dan. Došli su nan i gosti glazbari od Trogira, odma boje buci pijaca. Svi znaju svirat naše kolo! Bila je i naša Robinja. Stariji ”kudovci”,  lipo ih je bilo vidit i ono dvoje male dice ke suze tereju. Robinjica nan je uvatila lipe godišća,  ali joj besede ne moreju ostat uglavu. Da ni karte….

Pod vrnjacon meštra Boba, kod Vedrana se je skuvalo još više fažola nego prvi dan. Vrhon puna teća. Poštimali smo gosti od Trogira, a onda je domaći svit pofalli da je fažol boji nego od nedije. Okolo osan i pol kala se je barjak. Gre zadnje kolo.  Kašićevon do rive, pa gori Velon ulicon do pijace. Lipo je bilo vidit kako svi kolaju. Glazba na sicju, piva se ”Karnevale dobro moje”.

Na kraj – vatromet. Podilili smo BNB i s tin završili ovu vecer.

Srida – Marko.

Žalosna povorka dopratila je Marka na pijacu.  Branko je pročita oporuku, teštament i partili smo prema mostu. Užgali smo Marka i ufamo se da je sve zlo partilo šnjin.